LAOAG CITY – Inlawlawag ti kampo ni Leyte Rep. Ferdinand Martin Romualdez ti report mainaig iti precautionary hold departure order (PHDO) nga inparuk-at ti Sandiganbayan iti kiddaw ti Office of the Ombudsman.
Inbatad ni Atty. Ade Fajardo, abugado ken pannakangiwat ni Romualdez, nagtalinaed ditoy Pilipinas ti kongresista ken saan a timmalaw ditoy pagilian.
Kunana nga aniaman a report nga isuna ket naglibas ket biddot ken iresponsable.
Inpetteng ni Fajardo a dimmalan iti umno a proseso ni Romualdez idi nagkiddaw ken nakaala ti kasapulan a travel authority ken nakikoordinar a nasayaat iti Department of Justice ken Bureau of Immigration para iti maysa a naababa, uppat nga aldaw a medical check-up iti doktorna iti Singapore.
Inpakaammo ti kampo, sipud pay idi rugi ket inpakita ni Romualdez ti kooperasion, transparency ken panangrespetar iti legal a proseso.
Inpasingked ni Fajardo nga usarenda ti amin a nasken a legal remedies tapno kwestionaren ti panangiparuk-at ti precautionary hold departure order iti umno a forum.
Inpanamnama ti kongresista a nakasagana daytoy a sangoen a direkta dagiti alegasion kontra kenkuana.
