LAOAG CITY – Nakasagana a sumango ni dati a House Speaker ken Leyte 1st District Rep. Martin Romualdez iti maiwaywayat a preliminary investigation ti Office of the Ombudsman mainaig iti maipagarup anomalya kadagiti flood control project.
Segun ken ni Atty. Ade Fajardo, abogado ni Romualdez, sungbatan ti kongreista dagiti amin nga alegasion kontra kenkuana ngem kiniddawna ti patas a proseso bayat ti imbestigasion.
Inbatad ni Fajardo nga awan ti plano ni Romualdez a rumuar iti pagilian ken agtultuloy daytoy iti obligasionna kas pannakabagi ti umuna a distrito ti Leyte.
Innayon pay ni Fajardo nga awan ti nagbalin a papel ni Romualdez iti nabukel a 2025 national budget malaksid laeng iti panagpirmna, ken inpanagetgetna nga awan pakainaigan ni Romualdez iti implementasion dagiti flood control.
Mainaig iti dayoy, kwinestionaran ni Fajardo ti kredibilidad ti maipagrup 18 “maleta boys” nga agpampammarang a dati a bodyguards ni dati nga Ako Bicol Party-list Rep. Zaldy Co, a karaman kadagti testigo a manamnama nga aramaten ti Ombudsman iti imbestigasion.
