LAOAG CITY – Plano ti kampo ni dati nga House Speaker Ferdinand Martin Romualdez a mangipila ti petition for bail iti Sandiganbayaninton Lunes, Setiembre 28, mainaig iti sangsangoenna a kaso a plunder.
Segun ken ni defense lawyer Ade Fajardo, nabayagen a nakasagana ti petition-da ngem ur-urayenda pay laeng a malpas ti pre-trial proceedings sakbay daytoy nga ipila.
Naikeddeng ti bail hearing manipud Oktubre 12 agingga Nobiembre 12, iti kada Lunes, Martes ken Huebes.
Mangidasar ti prosecution ti 23 a testigo tapno suportaran ti posisionna a napigsa nga ebidensia kontra ken ni Romualdez.
Inbatad ni Fajardo a tingitingen pay laeng ti depensa ti ebidensia ti prosecution sakbay nga agdesision no siasinnoman kadagiti 40 a testigoda ti maipasango.
Maipagarup a posible nga agtestigo ni Romualdez iti panangidasar iti ebidensiada.
Maipalagip a sumangsango iti kaso a plunder ni Romualdez mainaig iti maipagarup a P7.4 billion kickback scheme nga adda pakainaiganna iti flood control ken dadduma pay a proyekto ti gobierno.
Naamoan a nagatendar iti pre-trial proceedings idi Biernes iti babaen ti videoconference manipud iti New Quezon City Jail gapu iti maipagarup a risgo iti transportasion wenno panagbiahena.
