LAOAG CITY – Nangipasa ti petition for bail ti kampo ti kontratista a ni Curlee Discaya iti korte kas addang tapno magun-od ti temporario a pannakawaya-wayana kabayatan a madengdengngeg ti kaso a sangsangoenna mainaig iti maipagarup a maanomalya a flood control projects idiay Bulacan.
Daytoy ti kinumpirmaran ti abugadona a ni Atty. Cornelio Samaniego III no sadinno nga inlawlawagna a mabalin pay nga agipasa ti petision ti kampoda para iti piyansa uray ti maysa a kaso ket maibilang a non-bailable.
Segun iti abugado, tingitingen ti korte no umdas ti ebidensia kontra iti akusado sakbay nga agdesision no mabalin daytoy a mapalubosan a makapiyansa.
Maipalagip a naarestar ni Discaya idi Hunio 8 kalpasan a napilaan ti kaso a malversation of public funds through falsification of documents mainaig iti maipagarup a maanomalya a panangipatungpal ti sumagmamano a flood control projects idiay Bulacan.
Iti agdama, nakabalud ni Discaya iti Bulacan Provincial Jail iti siudad ti Malolos kaduana ti dadduma pay nga indibidual a nairaman iti nasao a kaso.
