LAOAG CITY – Inlungalong ni Deputy Speaker ken Bacolod City Rep Albee Benitez a mangbukel ti gobyerno ti maysa a “crisis fund” ng agserbi kas “shock absorber” kadagiti saan a ninamnama a panagngato ti presyo ti langis, gapu ta masapol a kanayun a nakasagana iti bigla a panagpasar ti krisis.
Inlawlawag ni Benitez nga iti kanito nga agsublin iti norma ti presyo ti langis ket mabalin a makakolektar ti P1 agingga iti P2 iti kada litro ti langis, no sadinno a ti makolektar ket idulin tapno isu ti agbalin a reserve fund.
Kuna na a ti lungalong na ket saan a panangisubli iti regulated oil system ngem ketdi daytoy ket maysa nga “hybrid approach” a maysa a kasiguradwan nga adda ti standby resources ti pagilian iti kanito a makapasar ti krisis.
Innayon ni Benitez a ti kaadda ti maysa a pre-funded mechanism ket mangipasigurado nga adda ti alisto nga addang ti gobierno iti panawen ti krisis, adayo iti sitwasyon a mapaspasaran iti agdama nga agbiruk paylaeng ti pondo idinto nga addaan iti katengngaan ti krisis.
Inpaganetget pay ti agpanpanday linteg a masapol a maaddaan ti “proactive ken systematic approach” ti gobierno iti babaen ti panangikabil kadagiti pre-position mechanisms a dagus a mausar imbes a “reactive” nga agtignay laeng no addan ti problema wenno krisis.
Inpalgak ni Benitez a maud-udi ti panagtignay ti gobierno gapu ta dagiti measures ket naladaw a maidasar, no sadinno a daytoy ket maad-adal ken maipasa paylaeng iti kongreso no addan ti mapasaran a problema.
