LAOAG CITY – Inadmitir ti Catholic Bishops’ Conference of the Philippines (CBCP) a mabalin a maapektaran ti krisis iti langis ti panagobserbar ti Visita Iglesia wenno panagbisita kadagiti simbaan iti Holy Week inton sumaruno a lawas.
Daytoy ket iti baet ti sangsangoen nga agtultuloy a panagngato ti presio dagiti produkto a petrolyo.
Inbatad ni Catholic Bishops’ Conference of the Philippines Espiscopal Commission of Public Affairs Executive Secretary Fr. Jerome Secillano, maawatan ti simbaan no kalikagum dagiti tattao nga aginot kagiddan iti panagdanag kadagiti Pilipino nga apektado ti panagngato ti presio ti langis.
Kuna ni Fr. Secillano, no bilang imposible a makapan iti simbaan nangruna kadagiti natataengan ken masakit, available ti misa iti online platforms.
Inlawlawagna nga adda ti maaw-awagan a “virtual visit to the church,” masapul laeng nga i-click ti sites ken mabalin met nga agkararag iti mismo a pagtaengan no adda dagiti rason a saan a makapan.
Innayon ni Fr. Secillano, naikeddeng a mangiparuk-at ti Simbaan Katolika ti Oratio Imperata iti baet ti gubat idiay Middle East.
