LAOAG CITY – Naiget a banbantayan ti Department of Health (DOH) ti presio dagiti agas kagiddan iti mapaspasamak nga oil crisis.
Inbatad ni Department of Health spokesperson ken Undersecretary Albert Domingo, agtultuloy ti monitoringda kabayatan a mangiwaywayat ti dadduma pay nga addang kas ti inventory checks ken contingency planning, partikular kadagiti ospital ti Department of Health tapno masigurado a saan a maitantan ti suplay ti agas ken medical supplies.
Immunan nga inrakurak ti Department of Health nga agtultuloy ti panangmonitorda ti presio dagiti agas ken dagiti kagamitan daytoy kalpasan a nagballaag ti maysa nga ekonomista a posible a maapektaran ti inflation ti sektor ti salun-at gapu iti krisis idiay Middle East.
Innayon pay ni Domingo, kasapulan a siguradoen ti PhilHealth nga agtungpal daytoy iti manamnama a panagngato ti demand iti serbisio para iti salun-at.
