LAOAG CITY – Napalaos nga inawat ni United Kingdom Prime Minister Keir Starmer ti katulagan iti ceasefire iti nagbaetan ti Iran ken Estados Unidos kabayatan nga adda iti biahe daytoy tapno makipagkita kadagiti mangidadaulo kadagiti pagilian iti Gulf.
Inbatad ni Starmer a mangnamnama daytoy a pagsasaritaanda dagiti panangikagumaan iti diplomatiko a suportaran ken itandudo ti ceasefire.
Kunana a babaen ti ceasefire deal ket makaipaay ti naluklukay a situasion iti rehion ken iti intero a lubong.
Inlawlawagna a kabinnulig dagiti kaalyadoda a pagilian ket nasken laeng nga aramidenda ti amin a kabaelanda tapno suportaran ken mapagtalinaed ti ceasefire ken aramiden a maysa a napapaut a katulagan ken malukatan manen ti Strait of Hormuz.
Naammoan a manamnama a makipagkita ni Starmer kadagiti military personnel ti United Kingdom iti rehion kas paset ti Gulf trip-na a naplano daytoy sakbay pay ti pannakaanunsio ti ceasefire.
Namunganay ti ceasefire deal kalpasan a nagpangta ni United States President Donald Trump a matay ti sibubukel a sibilisasion no saan nga umanamong ti Iran a lippasen ti gubat ken lukatan ti Strait of Hormuz.
Kabayatanna, naikeddeng nga agsubli ti Prime Minister idiay United Kingdom inton Biernes.
