LAOAG CITY – Inpaayan ti 13th Sangguniang Panlungsod ti Resolution of Commendation ni Mayor James Bryan Alcid ditoy ciudad ti Laoag.
Daytoy ket kalpasan a napagtalinaed ti Schools Division Office – Laoag City ti kampeonato ti Region 1 Athletic Association (R1AA) Meet a nangitunda ti 3-Peat Champion iti babaen ti liderato ni Mayor Alcid.
Ti resolusyon ket ininsponsoran ni Vice-Mayor Rey Carlos Fariñas, a sangsangkamaysa nga inaprobaran ti Sangguniang Panlungsod ditoy ciudad.
Mainaig iti daytoy, iti panagbitla ni Mayor Alcid ket nagyaman iti panangkomendar kenkuana ti konseho.
Kunana a nagun-od ti balligi babaen ti panagtitinnulong da, partikular ti City Government, Schools Division Office-Laoag City, coaches, trainors, nagannak, amin a timmulong ken kangrunaan na dagiti student-athletes.
Malaksid iti daytoy, ibilang ti mayor a ti maysa kadagiti nagbalin a karit kenkuana ket ti panangdependar ti kampeonato iti Region 1 Athletic Association (R1AA) Meet.
Kabayatanna, kuna ni Alcid nga adda iti manamnama a maangay a vitory party para iti panagkampeon ti Laoag City Team iti Region 1 Athletic Association (R1AA) Meet intono umay a lawas.
