LAOAG CITY – Nakairekord ti panagbaba iti kababaan a tukad iti uneg ti siam a bulan ti patulod a kuarta dagiti Overseas Filipino Workers (OFW) idi bulan ti Pebrero ngem nagtalinaed a nangatngato ti pakabuklan a pundo a naiserrek iti pagilian ita a tawen.
Basar iti inparuk-at a datos ti Bangko Sentral ti Pilipinas (BSP), ngimmato laeng ti $2.786 bilyon (₱167.08 bilyon) ti nairekord a cash remittances wenno dagiti naipatulod a dimmalan iti bangko idi Pebrero.
Nababbaba daytoy maidasig iti $3.020 bilyon (₱181.11 bilyon) a nairekord idi bulan ti Enero.
Daytoyen ti kababaan a tukad a nairekord sipud pay idi Mayo 2025.
Nupay kasta, nangatngato daytoy bassit maidasig iti $2.716 bilyon a nairekord idi Pebrero iti napalabas a tawen.
