LAOAG CITY – Mamati ni Bise Gob. Matthew Marcos Manotoc a nasalun-at ni Pres. Ferdinand Marcos Jr.
Segun kenkuana, makitkita nga agtrabtrabaho ti presidente ken nasayaat met ti langana ken awan ti ania man a pagilasinan nga adda ti sagsagabaen na a sakit.
Nupay kasta, inlawlawag na a saanna a madendennaan ni Presidente Marcos Jr. gapu ta ad-adda met nga agtaltalinaed ditoy probinsia.
Iti baet daytoy, kalikagom ti bise gobernador a kanayun latta nga adda ti presidente iti nasayaat a kasasaad ken awan ti ania man a problema iti salun-at na.
Innayon na a no adda man ti problema ti ulitegna a presidente ket agtalek a kabaelan na a solbaren wenno sangwen a kas iti makitkita a kinasarantana nga aggungunay.
Maipalagip a nagwaras ti damag a nakapsot ni Presidente Marcos Jr., banag a naglikudan met ti Malacañang ken mismo a ti presidente ket inpakita na ti kinapigsana iti publiko babaen ti panag-jogging na iti ruwar ti Malakanyang.
