LAOAG CITY – Bimmagsak ti presio ti krudo iti world market kalpasan nga inanunsio ti Iran a “completely open” ti Strait of Hormuz kadagiti commercials ships a dumaldalyasat iti lugar.
Basar iti report, bimmaba ti sumurok-kumurang $88 iti kada bariles ti Brent crude manipud iti sumurok $98 ita nga aldaw ti Sabado.
Ti Strait of Hormuz ket maysa a napateg a ruta a mangitunda ti 20% ti sangalubongan a langis ken liquefied natural gas.
Inbatad ti Iranian Foreign Minister Abbas Araghchi a mabalin a makadalyasat ti amin a commercial vessels kabayatan a maipatpatungpal ti ceasefire iti rehion.
Gapu iti daytoy, ngimmato met dagiti stock market iti Estados Unidos ken Europa no sadinno a ngimmato ti S&P 500, Nasdaq ken Dow Jones ti agingga sumurok 1%, idinto a dagiti merkado iti Europa kas ti DAX iti Germany ken CAC iti France ket ngimmato ti sumurok 2%.
Maipalagip a naaddaan ti panagngato iti presio ti langis kadagiti naglabas a lawas gapu iti tension iti nagbaetan ti Iran ken Israel nga umabot pay daytoy iti sumurok $100 iti kada bariles ken naminsan a limmabes iti $119.
Iti baet ti panaglukat ti ruta, nagtalinaed a naannad ti sumagmamano a shipping companies ken kunana nga agurayda pay laeng sakbay a dumalyasat iti nasao a lugar gapu iti isyu ti seguridad.
Kabayatanna, sumagmamano nga analyst ti nangirakurak a mabalin nga agtalinaed a pabaliw-baliw ti presio ti langis kabayatan a saan pay a naan-anay nga stable ti situasion iti rehion.
