LAOAG CITY – Nagballaag ni Presidente Ferdinand Marcos Jr. kadagiti oil company nga ipatungpal nga awan ti pannakaitantan ken aberya ti rollback iti presio ti petrolyo.
Segun iti Presidente, sumango iti maiyannatop a tignay ti gobierno dagiti kompania nga aglabsing iti daytoy.
Nagpawagan isuna iti publiko nga insigida nga ag-report iti Malacañang ken Department of Energy (DOE) no adda dagiti maobserbaran a panaglabsing.
Kagiddan daytoy, inpalagip manen ti Presidente nga agtultuloy ti ₱10 fuel discount para kadagiti public vehicle utility (PUV) ken bus pakairamanan ti Service Contracting Program ken dadduma pay a programa ti gobierno.
Inpasigurado ti Presidente a saan nga agsardeng ti gobierno agingga a saan a marikna ti tunggal Pilipino ti nam-ay gapu iti rollback ken dadduma pay a suporta nga ipapaay ti estado.
