LAOAG CITY – Inbatad ti Commission on Elections nga agsagsagana da latta para iti Barangay ken Sangguniang Kabataan Elections uray no ilunglungalong dagiti sumagmamano nga agpanpanday linteg nga itantan ti naituding nga eleksion intono Nobyembre 2 ita a tawen.
Iti baet daytoy, inpasigurado ni Commission on Elections Chairman George Erwin Garcia a suroten da ti aniaman a pammilin ti Kongreso.
Segun ken ni Garcia, maibasar iti immuna a desisyon ti Korte Suprema ket masapol a ti panangitantan ti eleksion, ket kasapulan nga adda ti “legitimate government interest.”
Mamati ti opisial a ti krisis a mapaspasaran ti pagilian iti agdama ket saan a maibilang a lehitimo a government interest, aglalo ket maap-apektaran ti pagbiagan ti kaaduan a Pilipino gapu iti tension iti Middle East.
