LAOAG CITY – Naawaten ti House Committee on Justice ti Statement of Assets, Liabilities and Net Worth (SALN) ni Vice President Sara Duterte basar ken ni panel member Representative Terry Ridon.
Basar iti datos, ngimmato ti net worth ni Vice President Sara manipud P71 milyon idi 2022 ket nagbalin a P77.5 milyon idi 2023 ken umabot iti sumurok P88.5 milyon idi 2024 nga adda ti pakabuklan nga assets a sumurok P98.4 milyon.
Inbatad ni Rep. Ridon, tingitingenda no nainkalintegan ti panagadu ti kinabaknang ken no adda ti “unexplained wealth” wenno saan a mailawlawag a kinabaknang.
Dinakamat ti agpanpanday linteg ti posible nga isyu iti deklarasion ni Vice President Sara kas stockholder ti maysa a kompania idiay Davao City a maipagarup a saan a tugma iti panangberipikarda.
Matalantan daytoy iti agtultuloy a panagdengngeg iti impeachment complaints nga inatendaran da Ombudsman Jesus Crispin Remulla, dagiti pannakabagi ti Anti-Money Laundering Council ken dati a Senador Antonio Trillanes IV pakairamanan dagiti opisial ti Bureau of Internal Revenue (BIR) ken Securities and Exchange Commission (SEC).
