LAOAG CITY – Ad-adda pay a mapapigsa ti kampanya ti panagbakuna kontra iti nagduduma a sakit ditoy pagilian.
Kagiddan ti World Immunization Week, pinaigetan ti Mercury Drug, katulungan na ti Philippine Foundation for Vaccination (PFV), ti kampanya tapno maipangato ti ammo ken mapalawa ti access iti panagbakuna, aglalo iti babaen kadagiti botika nga al-alisto a pagturungan ti publiko.
Basar iti datos, mapatta-patta nga adda ti 67% dagiti Pilipino ket karaman iti labor force a mangsupsuporta iti pamilya da ken iti ekonomiya.
Nupay kasta, nagtalinaed a nababa ti vaccination coverage gapu iti nagduduma a lapped kas ti limitado nga access, kinakurang ti ammo ken gastos nga aggapo iti bukod a bulsa.
Inpetteng ni Dr. Lulu Bravo, Executive Director ti Philippine Foundation for Vaccination, ti tema ita a tawen a “For Every Generation, Vaccines Work” ket pammalagip a saan laeng a para kadagiti ubbing ti proteksyon manipod iti bakuna no di ket uray pay kadagiti nataengan.
Kabayatanna, nagutigot ti publiko nga ad-adda pay nga agbalin nga aktibo iti panangsalwad ti salun-at iti babaen ti panagpakonsultar kadagiti doktor mainaig kadagiti bakuna a maibagay iti tawen ken kondisyon.
