LAOAG CITY – Pursigido ni Senate President pro-tempore Ping Lacson a maidatag iti sesyon inton Lunes, Mayo 4, ti progress report dagiti panagdengngeg ti Senate Blue Ribbon Committee mainaig iti maanomalya a flood control projects.
Daytoy ket iti baet a kukwestionaran ni Senate Minority Leader Alan Peter Cayetano ti atension nga ipapaayna iti partial committee report nga apagapaman pay laeng ti naduktalan nga imbes a kitaen ti pakabuklan.
Inbatad ni Lacson a desidido isuna nga i-report iti plenario ti linaon ken no agingga ti patinggana ti naaramid ti Blue Ribbon Committee kalpasan ti walo a panagdengngeg.
Inlawlawagna nga adda ti rason no apay nga aramidenna daytoy gapu ta rumbeng laeng a maammoan dagiti Pilipino ti kinapudno iti baet kadagiti false narratives a parparuaren ti sumagmamano a kritiko a pilpilienda laeng dagiti kamaten ken pagsungbaten iti anomalya.
Inpettengna a ti panagpirma iti partial committee report iti imbestigasion iti flood control ket saan a kayatna a saoen a panangpabor no diket panangipaay ti wagas laeng tapno mai-report iti plenario ken mapagdedebatean, maamendaran ken naan-anay a patibkeren.
Naammoan a gapu ta kurang iti kasapulan a pirma, ti idatag ni Lacson iti panagsubli ti sesyon ket ti Chairman’s Progress Report a naglaon ti partial committee report ken idanonna daytoy babaen iti privilege speech.
