LAOAG CITY – Kalikagum a maiparuk-at ni Senador Loren Legarda iti Ehekutibo ti P220.39 billion a pundo ti PhilHealth a nabayagen nga ip-ipiten ken saan pay a naipaay agingga ita.
Kagiddan daytoy ti pammilin ni Presidente Ferdinand Marcos Jr. nga isubli iti PhilHealth ti P60 billion nga innala ti national government tapno usaren kadagiti proyekto ti gobierno.
Paset ti gatad ti P113.44 billion a naurnong a buis idi 2023 agingga 2025 manipud iti sin taxes wenno buis kadagiti produkto a tabako, arak ken nasam-it a mainum ken ti P106.95 billion a kontribusion iti PhilHealth ng Philippine Charity Sweepstakes Office (PCSO) ken Philippine Amusement and Gaming Corporation (PAGCOR).
Inbatad ni Legarda, Vice Chairman ti Committee on Finance, nasken nga ibusbos iti PhilHealth ti nakailatang a pundo para iti naan-anay a panangipatungpal ti Universal Healthcare Program.
Mamati ti senadora a saan a naan-anay a maipatungpal ti programa no in-inot ti panangiparuk-at ti pundo.
Namin-adu a daras nga inyasideg ni Legarda iti ehekutibo ti maipanggep iti daytoy iti budget ti PhilHealth ngem saan pay a napatgan.
