LAOAG CITY – Inpalagip ni Palace Press Officer Atty. Claire Castro ken ni Vice President Sara Duterte a natawid laeng ni Presidente Ferdinand Marcos Jr. ti nakadakdakkel nga utang ti Pilipinas iti amana a ni dati a Presidente Rodrigo Duterte.
Daytoy ti sungbat ni Castro kalpasan nga inrakurak ti Bise Presidente nga agtultuloy ti panagdakkel ti utang ti pagilian ken kinaawan ti trabaho gapu ta maipagarup a saan a nasayaat ti panagtrabaho ti gobierno ni Marcos.
Kuna ti Bise Presidente, nasken nga agpokus dagiti opisial ti gobierno, partikular ti Presidente iti trabahoda nga imbes nga ag-react kadagiti kritisismo iti social media.
Kuna ni Castro, normal kadagiti pagilian nga umutang tapno maitultuloy ti panangipaay ti serbisio ken ayuda kadagiti umili.
