LAOAG CITY – Naglikudan ti Iranian Oil Terminals Company dagiti damag mainaig iti maipagarup nga oil leak nga asideg iti Kharg Island, maysa kadagiti kangrunaan nga oil export hubs ti Iran iti Persian Gulf.
Rimmuar dagiti damag kalpasan a maipagarup a nangipakita ti satellite imagery ti dakkel nga oil slick iti kabaybayan iti laud ti isla kadagitoy naglabas nga aldaw.
Segun iti chief executive ti kompania, nangiwayatda ti naun-uneg nga inspeksion kadagiti storage tanks, pipelines, loading facilities ken dagiti tanker iti lugar ngem awan ti nakitada nga aniaman a senyales ti tedted ti langis.
Kuna ti opisial nga awan ti nairekord nga oil leakage ti Marine Emergency Mutual Aid Center wenno MEMAC, maysa a regional marine pollution monitoring body.
Innayonna a maipagarup a nangiwayat dagiti Iranian teams ti nayon a field inspections ken laboratory testing kalpasan a nagwaras dagiti nasao a damag ngem awan ti nakitada nga uray bassit laeng nga oil spill.
