LAOAG CITY – Awan ti plano ti Commission on Elections (COMELEC) nga iyalud-od pay ti voter registration para iti Barangay ken Sangguniang Kabataan Elections (BSKE) a maisayangkat inton Nobiembre 2, 2026.
Segun ken ni COMELEC Chairman George Erwin Garcia, awanen ti extension ti panagparehistro ken inton Lunes, Mayo 18, 2026 ti maudi nga aldaw daytoy.
Iti baet nga awan ti operasion ti COMELEC tunggal Lunes gapu iti work-from-home arrangement kas suporta iti national policy on energy conservation, lukatanda ti amin nga opisina ti COMELEC, satellite wenno mall registration sites iti nasao nga aldaw para kadagiti kumamat nga agparehistro.
Para kadagiti agkalikagum nga agparehistro pay, nakalukat dagiti opisina ti COMELEC mangrugi alas-8:00 ti bigat agingga alas-5:00 ti malem uray pay ti Sabado.
Kasapulan laeng a mangitugot ti maysa a valid government-issued ID gapu ta saan nga awaten ti cedula, barangay-issued certificate ken barangay ID.
Basar iti kaudian a datos tiCOMELEC, umaboten iti agarup 5,000,000 ti nakarehistron para iti eleksion a nangrugi idi Oktubre 20, 2025.
