LAOAG CITY – Nangdutok manen ti Senado kadagiti baro a committee chairmanship iti babaen ti liderato ni Senate President Alan Peter Cayetano.
Uppat a senador a miembro itan ti minority bloc ti inikkatan ti Chairmanship iti sumagmamano a komite.
Karaman ditoyen ni Senador Risa Hontiveros a dati a Chairperson ti Committee on Health a sinukatan ni Senador Bong Go, ni Senador Bam Aquino nga inikkat a Chairman ti Committee on Basic Education a sinukatan ni Senador Loren Legarda, Committee on Public Services nga idadauluan dati ni Senador Raffy Tulfo nga itan ket iggemen ni Senador Rodante Marcoleta ken ni Senador Erwin Tulfo a dati a Chairman ti Senate Committee on Games and Amusement a sinukatan ni Senador Jinggoy Estrada.
Nagtalinaed a Chairman ti Culture and the Arts Committee ni Legarda, ni Senador Pia Cayetano ket nagtalinaed met a Chairperson ti Ways and Means, Sustainable Development Goals ken Energy; ni Go latta ti Chairman ti Sports Committee; ni Senador Joel Villanueva a Chairman ti Higher, Technical and Vocational Education; ni Estrada nagsubli kas Chairman ti National Defense and Security; ken Senador Robin Padilla a Chairman latta ti Public Information and Mass Media ken Cultural Communities and Muslim Affairs.
Kabayatanna, dua met ti ikonkonsiderar a kasukat ni Senador Ping Lacson iti Blue Ribbon Committee da Senador Pia Cayetano ken Marcoleta.
