LAOAG CITY – Inrekomendar ti Field Investigation Bureau ti Ombudsman ti panagpila ti kaso a plunder ken indirect bribery kontra ken ni Sen. Rodante Marcoleta kalpasan a maipagarop a nagawat ti P75 milyon kas campaign donations iti napalabas a tawen.
Basar iti complaint-affidavit a napirmaan idi Mayo 18, kalikagom dagiti imbestigador a kasoan ni Marcoleta ti plunder karaman ni dati a Quezon City 2nd District Rep. Mike Defensor ken dua pay nga indibidwal a nangipaay ti donasyon iti senador.
Ti rekomendasyon ket paset ti nalawlawa nga imbestigasyon ti Ombudsman mainaig iti panagusar ti campaign funds ken possible a panaglabsing iti linteg kontra iti korapsyon.
Iti agdama, awan pay ti komento ti kampo ni Marcoleta mainaig iti nasao a reklamo.
Uray dagiti dadduma pay a nadakamat nga indibidual ket awan pay ti inparuk-at da a komento.
Ti kaso a plunder ket maysa kadagiti kadagsenan a kaso kriminal iti babaen ti linteg, nga addaan ti maiyannatop a pannusa a tungpal biag a pannakabalud no mapaneknekan a nagbasol.
Awan met ti mairekomendar a piyansa para iti temporaryo a pannakawaya-waya ti nagbasol.
Ti met bribery ket ilegal a panagawat ti pabor wenno kwarta kasukat ti impluwensiya wenno bileg.
