LAOAG CITY – Inlawlawag ni Mayor James Bryan Alcid nga awan ti kinapudnona a maluglugi ti mapaspastrek ti Laoag City Public Market and Commercial Complex.
Segun kenkuana, nakitaripnong isuna iti Officer In Charge ti nasao a tiendaan no sadinno nga adda ti average growth a 200 ribu a pisos iti kada bulan.
Malaksid iti daytoy, inbatadna nga adda ti manamnama a pannakapapintas ken pannakapasayaat ti merkado publiko tapno naur-urnos a kitaen dagiti aglaklako ken mapan gumatang.
Kunana a nagkiddawda iti Local Government Support Fund tapno naan-anay a matarimaan ti tiendaan a pakabenepisiaran dagiti umili.
Innayonna nga apaman nga addanton ti pundo a maiparuk-at ket insigida a maiplastar a naimbag ti tiendaan aglalo ket nabayagen daytoy a naipasdek.
Immuna iti daytoy, inpakaammo ni Vice Mayor Rey Carlos Fariñas a kasapulan ti pannakaplastar ti Laoag City Public Market and Commercial Complex.
