LAOAG CITY – Kwinestionaran ni Senate President Alan Peter Cayetano ti panagulimek ti minorya iti inaramid a panangdangran ti sumagmamano a kameng ti National Bureau of Investigation (NBI) iti maysa a kameng ti Office of the Sergeant-at-Arms (OSAA) idi Mayo 11, ti aldaw a nagpakita ni Senador Bato dela Rosa iti Senado.
Binabalaw ni Cayetano nga alisto ti inaramid a panangkondenar ti minority bloc iti video presentation ni Senador Imee Marcos ngem naulimekda iti panangdangran iti napasamak iti empleado ti Senado.
Inpetteng ti Senate President a napasamak ti insidente ti panangdangran iti Office of the Sergeant-at-Arms iti uneg mismo ti Senado ngem awan ti nangngegna iti oposisyon a nag-react a nadungritan ti dignidad ditoy ti Senado.
Dinakamatna a linappedan pay ti National Bureau of Investigation ti dadduma a kameng ti Office of the Sergeant-at-Arms a tulungan ti dinangran nga empleado, pinosasan ken pinilit nga ikabil iti lugan dagitoy.
Innayonna a maysa laeng kadagiti minority members ti nangngegna a nagsarita iti napasamak a daytoy ket ni Senador Migz Zubiri ngem saan daytoy a kimmontra nga awan ti reaksion ti dadduma gapu ta iyur-urayda ti independent investigation.
