LAOAG CITY – Walo nga estudyante ti inarestar dagiti otoridad gapu iti maipagarop a pannakainaig da iti napasamak nga uram iti maysa a pagadalan idiay Kenya a nakatayan ti 13 nga agad-adal.
Napasamak ti insidente iti Utumishi Girls Academy iti Gilgil, agarop 120km ti kaadayo na manipod iti north-west ti ciudad ti Nairobi a kabisera ti Kenya.
Segun iti National Police Service, kalpasan ti panaginterview da kadagiti estudyante ken staff, kasta met ti forensic review iti Closed Circuit Television (CCTV) footage, nabigbig da dagiti walo nga agad-adal kas “persons of interest” mainaig iti panagplano ken panangipatungpal iti pannakauram ti nasao a pagadalan.
Maipalagip a napasamak ti uram kabayatan a matmaturog dagiti estudyante no sadinno a ti nasao a pagadalan ket eksklusibo a pages-eskwelaan laeng dagiti babbai.
