LAOAG CITY – Natay ti dua nga indibidual kalpasan a napaltugan da kabayatan ti nadamsak a tignay protesta iti ili ti Nanyuki idiay Kenya.
Naipatungpal ti tignay protesta kas panangkontra dagiti demonstrador iti plano ti Estados Unidos a mangestablisar ti Ebola isolation centre iti military base idiay Kenya.
Maysa kadagiti biktima ket napaltugan iti asideg ti Laikipia Airbase a nagtitiponan dagiti naruay a demonstrador, no sadinno a pimmusay daytoy kabayatan ti panangitaray ti pagayam na iti ospital.
Kabayatanna, ti maysa met a biktima ket pimmusayen idi inkabil dagiti soldado iti ospital.
Ti plano ti Estados Unidos a mangestablisar ti Ebola treatment facility idiay Kenya ket nangitunda ti public concern maipanggep iti risgo ti cross-border infection.
Naamoan a ti 50-bed isolation centre ket iwanwan dagiti US medics ken ditoy a maagasan dagiti US citizens a mabalin a maapektaran ti agdama nga outbreak iti Democratic Republic of Congo.
Iti agdama ket awan pay ti nairekord a kaso ti ebola iti Kenya.
