LAOAG CITY – Natay ti maysa nga indibidual ken sumurok 60 ti nasugatan kalpasan ti drone strike iti Kuwait International Airport iti baet ti kumarkaro a tension iti nagbaetan ti Estados Unidos ken Iran.
Dinakamat ti Kuwait Ministry of Defence ti insidente kas “criminal Iranian aggression,” idinto nga inrakurak ti foreign ministry a sumagmamano a diplomatic missions ti naapektaran ti panangatake.
Inadmitir ti Islamic Revolutionary Guard Corps (IRGC) nga isuda ti adda iti likudan ti operasion ken inpettengna a daytoy ket panangibales ti nagbalin a tignay ti Estados Unidos kontra iti maysa nga Iranian oil tanker ken iti Qeshm Island.
Inbatad ti Iran a target ti operasion dagiti United States base kadagiti nagduduma a paset ti Gulf region.
Naammoan a kas sungbat, pinaawid ti Kuwait ti dua nga Iranian diplomats iti uneg ti 24 nga oras ken pinaayabanna ti Iranian chargé d’affaires.
