LAOAG CITY – Inbasura ti Sandiganbayan Seventh Division ti kiddaw ni dati nga House Speaker ken Leyte 1st District Representative Martin Romualdez nga ikkaten ti precautionary hold departure order (PHDO) a naipataw kontra kenkuana.
Basar iti desision nga addaan ti petsa nga Hunio 1 ken insurat ni Associate Justice Lorifel Pahimna, napaay ni Romualdez a mangipakita ti umdas a pagibasaran tapno palubosan isuna nga agbiahe iti ballasiw taaw para iti maipagarup a medical check-up.
Segun iti graft court, saan a nakaisubmitir ti kongresista dagiti kasapulan a dokumento pakairamanan ti medical abstract ken dadduma pay a medical records tapno suportaran ti kiddawna.
Kuna ti korte a napaay ni Romualdez a paneknekan nga urgent ti medical consultation ken treatment daytoy iti ballasiw taaw.
Gapu iti daytoy, saan a nakita ti Sandiganbayan ti umdas a rason tapno ibabawi ti maipatpatungpal a precautionary hold departure order kontra kenkuana.
Iti daytoy a desision, inpaganetget ti korte a maibilang latta a flight risk ni Romualdez kabayatan a madengdengngeg ti kaso a sangsangoenna.
Basar kadagiti rekord ti kaso, maitudtudo a kangrunaan nga akin-utek wenno mastermind ni Romualdez iti maipagarup nga anomalya mainaig iti kontrobersial a flood control projects a manarimaan nga im-imbestigaran dagiti otoridad.
Agtultuloy nga iyur-uray ti agbalin a sumaruno nga addang ti kampo ni Romualdez maipanggep iti nagbalin a desision ti Sandiganbayan.
