LAOAG CITY – Naisayangkat ti libre a panagpukis ken medical services manipud iti Philippine Red Cross kagiddan ti Brigada Eskwela iti Sarrat National High School.
Segun ken ni Dr. Dennis Christopher Salvador, Principal iti nasao a pagadalan, babaen ti pannakibinnuligda iti Philippine Red Cross ket ad-adda a maitandudo ti Health and Wellness program kadagiti agad-adal.
Inbatadna a kalikagumda nga ad-adda nga agbalin a komportable dagiti amin nga estudiante apaman iti panagsubli dagitoy iti pagadalan.
Mainaig iti daytoy, inpakaammo ni Dr. Salvador a nagbalin a naannayas ti manarimaan a pannakaisayangkat ti Brigada Eskwela sipud nangrugi daytoy idi Lunes, Hunio 1.
Innayonna nga adda pay dagiti non-government organizations, stakeholders, alumni ken dadduma pay a nangted ti nagduduma a cleaning materials a mausar para kadagiti classroom-da.
