LAOAG CITY – Naarestar ti maysa a kameng ti Lesbian, Gay, Bisexual, Transgender and Queer wenno LGBTQ Community gapu iti panagikotna ti iligal a droga iti maysa a bar iti Barangay 1, San Lorenzo ditoy siudad ti Laoag.
Ti suspek ket agtrabtrabaho iti maysa a Business Outsourcing Company iti ili ti San Nicolas ken residente iti Cainta, Rizal ngem agdama nga agnanaed ditoy siudad ti Laoag.
Basar iti Laoag City Police Station, nagturong ti suspek iti nasao a bar ket ditoy a maipagarup nga adda ti indiayana nga iligal a droga iti maysa a lalaki.
Gapu iti daytoy, insigida nga in-report ti lalaki kadagiti otoridad maipanggep iti daytoy a napasamak nga insigida met a nagresponde dagiti kapulisan iti lugar.
Nakita pay iti ikot ti suspek ti dua nga heat sealed transparent plastic sachet a naglaon ti maipagarup nga iligal a droga iti uneg ti bag daytoy.
Kabayatanna, inadmitir ti suspek nga agus-usar isuna ti iligal a droga ken gumatgatang laeng daytoy.
