LAOAG CITY – Maysa a maritime drone ti bimtak iti Constanta port ti Romania basar iti Romanian Ministry of National Defense.
Nabirokan ti dadduma pay a drone iti aglawlaw ti lugar a nangitunda ti panagdanag iti agtultuloy a panagwaras ti epekto ti Russia-Ukraine war kadagiti kaparanget a pagilian ti North Atlantic Treaty Organization wenno NATO.
Ti drone ket self-detonated agarup 10:30 ti bigat a lokal nga oras asideg iti maysa nga oil terminal.
Awan ti naipadamag a nasugatan ngem insigida a naibakwit iti port ken nabalakadan dagiti residente iti kabaybayan ti Black Sea nga aglemmeng.
Basar iti Kyiv, ti drone ket kukua ti Ukrainian Navy ken naiyaw-awan ti ruta kalpasan a naapektaran ti electronic warfare systems ti Russia.
Inbatad ni Presidente Nicusor Dan a daytoy ti maikadua a security incident ita a lawas iti Romanian seaside.
Naammoan nga iti kallabes, pinabettak ti Romanian navy ti maysa a Russian anti-landing mine a nakadanon iti baybay.
Iti napalabas a lawas, maysa a Russian drone ti nagsuek iti maysa nga apartment building iti Romania.
Kuna ni Ursula von der Leyen ti insidente ket “direct consequence” ti Russia-Ukraine war ken pangta kadagiti pagilian nga adda iti daya ti Europa.
Maipalagip nga agin-invest ti European Union iti anti-drone capabilities, air defense ken early warning systems.
Malaksid iti Romania, naapektaran pay ti Azerbaijan kalpasan a natay ti lima nga indibidual iti panangatake iti dua a cargo vessels iti Sea of Azov.
