LAOAG CITY – Bimmaba ti sulfur dioxide wenno toxic gas emission ti Bulkan Taal kalpasan ti nangato a nairekord a panagalburuto daytoy kadagiti naglabas nga aldaw basar iti Philippine Institute of Volcanology and Seismology (Phivolcs).
Iti kaudian a monitoring, umabot iti 3,105 metric tons ti sulfur dioxide ti inpugso ti bulkan iti napalabas a 24 nga oras, adayo iti 6,287 metric tons a nairekord idi Huebes.
Nakairekord pay ti Taal dagiti asok nga umabot iti 1,500 meters ti kangato a naiturong iti amianan a daya ti angin.
Inbatad ti Phivolcs, awan ti naobserbaran a panagpugso ti ti napudot a likido iti aglawlaw iti ngiwat ti bulkan ken awan ti nairekord a volcanic smog wenno vog.
Naammoan a dua a volcanic tremor a nagpaut manipud iti maysa agingga siam a minuto ti nairekord iti Taal.
