LAOAG CITY – Naiget a naglikudan ni Department of the Interior and Local Government (DILG) Secretary Jonvic Remulla dagiti damag a maipagarup a nakaawat ti espesyal a panangtratar ti contractor a ni Curlee Discaya kalpasan daytoy nga inarestar mainaig kadagiti kaso nga adda ti pakainaiganna iti maipagarup a maanomalya a flood control projects.
Inbatad ni Remulla nga awan ti kinapudnona dagiti alegasion a protprotektaran ni Discaya gapu iti maipagarup a koneksion daytoy kadagiti nabileg a personalidad iti pulitika.
Inlawlawagna a kas ti dadduma a balud ket maikabil ni Discaya iti regular a detention facility.
Kunana nga iti Korte ti bileg nga agdesision no sadinno ti pakaibaludan ti maysa nga akusado kabayatan a maiwaywayat ti panagdengngeg ti kaso daytoy.
Kabayatanna, kuna ni Remulla nga agtultuloy ti imbestigasion iti maipagarup a flood control scam ken namnamaen pay ti pannakaarestar ti dadduma pay a karaman iti operasion.
Maipalagip nga immunan nga inarestar ti asawa ni Curlee a ni Sarah Discaya a manarimaan a nakabalud iti Lapu-Lapu City Jail idiay Cebu.
