LAOAG CITY – Nagpangta ni United States President Donald Trump a mangiwayat manen ti panangatake ti Estados Unidos iti Iran ita nga aldaw kagiddan ti baro a panagsinnukat dagiti strike iti nagbaetan ti dua a pagilian.
Iti rakurakna iti Oval Office, inbatad ni Trump a mangiwayatda ti naiget a panangatake iti Iran kalpasan dagiti immunan nga opensiba ken inpettengna manen ti panawaganna a makitinnulag iti Tehran.
Kabayatanna, inpaganetget ni Iranian President Masoud Pezeshkian a nakasagana ti Iran kontra iti aniaman a pressure wenno pangta manipud iti Estados Unidos.
Immuna iti daytoy, nangiwayat ti airstrikes ti Estados Unidos kontra iti Iran kalpasan ti report a maipagarup a pinaltogan ti Iran ti maysa nga United States Army helicopter idinto a nagibales met ti Islamic Revolutionary Guard Corps (IRGC) iti babaen ti panangatake kadagiti base ti Amerika iti rehion.
Iti nagsina a report, inrakurak ti United States military a dinadaelna ti oil tanker iti Gulf of Oman a maipagarup a naglabsing iti blockade ken manggangandat a mangitugot ti langis manipud iti Iran.
Agtultuloy ti kumarkaro a tension iti nagbaetan ti dua a pagilian idinto a nagtalinaed ti posibilidad ti nalawlawa a military escalation iti rehion.
