LAOAG CITY – Kinumpirmaran ni P/Cpt. Elison Pasamonte, Hepe ti Badoc Municipal Police Station nga addan ti dua nga indibidual ti natay kalpasan a natnag ken nagbaliktad ti Toyota Fortuner iti irigasion iti ili ti Badoc.
Segun kenkuana, maysa pay a senior citizen ti nairekord a pimmusay kabayatan a matamtaming iti ospital iti Mariano Marcos Memorial Hospital and Medical Center iti siudad ti Batac idinto nga agtultuloy met a maag-agasan dagiti dadduma pay a biktima.
Inlawlawagna nga awanen ti plano dagiti pamilia dagitoy a mangipila ti kaso kontra iti driver gapu ta agkakabagianda met laeng dagitoy.
Maipalagip nga inpakaammo ni P/Cpt. Pasamonte a natay ti maysa a senior citizen a babai kalpasan a natnag ken nagbaliktad ti naglugananda a Toyota Fortuner iti irigasion iti paset ti Barangay Sta. Cruz iti ili iti Badoc.
Inadmitir ti driver a nakaturog no sadinno a kabayatan ti kaaddada iti agkurba a paset ti kalsada ket kellaat a pimmaspas ti taray ti behikulo.
Naammoan a posible a napaddakan ti driver ti silinyador ti lugan gapu iti pannakairidepna a nangitunda iti napasamak a disgrasia.
Immuna iti daytoy, inpakaammo ni Pasamonte nga adda ti innem nga indibidual nga agkakabagian a nakalugan iti nasao a Toyota Fortuner a pakairamanan ti tallo a senior citizen a babbai ken dagitoy ket agpapada a taga Langanilang, Abra ken agturong koma dagitoy iti Sta. Praxedes iti probinsia ti Cagayan idi napasamak ti insidente.
