LAOAG CITY – Naibaluden ti suspek a naarestar gapu iti search warrant operation iti ili ti San Nicolas.
Daytoy ti inpakaammo ti front desk officer ti Philippine National Police iti nadakamat nga ili.
Segun kenkuana, daytoy ket kalpasan a balligi a naipila ti kaso kontra kenkuana a panaglabsing iti Republic Act 10591 wenno ti Comprehensive Firearms and Ammunitions Regulation Act of 2012 ken Republic Act 9165 wenno Comprehensive Dangerous Drugs of 2002.
Maipalagip nga idi Setiembre 23, nangisayangkat ti Philippine National Police iti ili ti San Nicolas iti search warrant operation iti maysa a pagtaengan iti maysa a lalaki ng agtawen ti 22, awanan asawa, awanan trabaho ken residente ti Barangay 24 Sta. Monica iti nadakamat nga ili.
Nakumpiskar manipud iti suspek ti maysa a black sling bag, maysa a caliber 22 revolver, 17 a pidaso ti bala ti caliber 22, dua a pidaso ti transparent plastic sachets a naglaon ti sumurok-kumurang maysa a gramo ti mapapati a shabu nga adda standard drug value-na a P6,800.
Kabayatanna, addan iti kustodiar ti Philippine National Police iti ili ti San Nicolas dagiti nakumpiskar nga ebidensia ken ti suspek.
