LAOAG CITY – Nakaukkon ti Bureau of Internal Revenue (BIR) ti P279.1 bilyon idi Mayo 2026, nangatngato ti 14.15% maidasig iti kapada a bulan iti napalabas a tawen.
Limmabes daytoy iti target ti ahensia a P279.056 bilyon.
Inbatad ni Bureau of Internal Revenue Commissioner Charlito Martin R. Mendoza a nakatulong ti inyalud-od a filing season ken ti kooperasion dagiti agbaybayad ti buis iti napintas a resulta.
Inlawlawag ni Mendoza a ti pannakaiyalud-od nga inpaay ni Presidente Ferdinand Marcos Jr. ket nangipaay ti nayon a panawen kadagiti taxpayer tapno maurnos a maka-file ken makabayad iti baet ti energy crisis.
Manipud Enero agingga Mayo 2026, umabot iti P1.434 trilyon ti pakabuklan a birok ti Bureau of Internal Revenue a nangatngato ti 5.49% wenno P74.582 bilyon maidasig iti kapada a panawen idi 2025.
Innayon ni Mendoza a nagun-od ti panagdur-as kagiddan ti panangipatungpal dagiti reporma iti babaen ti BIR DARES agenda pakairamanan ti panangirubuat ti Taxpayer Portal ken QR-enabled Certificate of Registration para iti online businesses.
