LAOAG CITY – Naipaay ti 12 a Nego-Kart wenno Negosyo sa Kariton kadagiti maibilang a Micro Small and Medium Enterprises wenno MSMEs kagiddan iti pannakaselebrar ti maika-61 a Charter Day ditoy siudad ti Laoag.
Malaksid iti daytoy, naited pay ti dua nga ambulansia iti City Disaster Risk Reduction and Management Office ken Department of Public Safety, TODA tents, agricultural inputs ken dadduma pay.
Segun ken ni Mayor James Bryan Alcid, saan a liplipatan ti pudno a gagem para iti ad-adda pay a panagdur-as ti siudad.
Inbatadna a masapul a mapagtalinaed a naimbag dagiti nagduduma a sektor tapno awan ti tumaod nga aniaman a problema dagiti umili.
Inlawlawagna a kas ti inkarina a kanayon nga ipangpangrunana ti public safety ken welfare tapno masigurado ti kinatalged ti amin a residente.
Kabayatanna, inpakaammo ni Gov. Cecilia Araneta Marcos nga adda ti maipaay a 80 nga e-bike para kadagiti Barangay Health Workers tapno ad-adda a maipadanonda dagiti serbisio kadagiti komunidad.
