LAOAG CITY – Naragsakan ti sumagmamano a residente ti Estados Unidos ti panagpirma ti pagilian ken ti Iran iti maysa a memorandum of understanding a gagem nga ilungalong ti peace deal iti nagbaetan ti dua a pagilian.
Nupay kasta, iti baet ti positibo a panangawat ti sumagmamano a sektor, naruay latta ti agpangpangadua iti katulagan partikular ti sumagmamano a miembro ti Democratic Party nga agtaltalinaed a naannad iti epekto ken implementasion daytoy.
Mangnamnama ti sumagmamano a residente a ti nasao a katulagan ket mangitunda ti positibo nga epekto iti world market pakairamanan ti posible a panagbaba ti presio ti petrolyo.
Nupay kasta, iti agdama ket saan pay a marikna ti aniaman a panagbalbaliw iti presio ti langis iti merkado.
Agtultuloy nga imon-monitor dagiti eksperto ti agbalin nga epekto ti katulagan iti world economy ken relasion ti dua a pagilian.
