LAOAG CITY – Inkeddeng ti International Criminal Court (ICC) ti pormal nga schedule para iti maikadua nga status conference iti kaso a sangsangoen ni dati a Presidente Rodrigo Duterte mainaig iti maipagarup a crimes against humanity gapu iti nadara a ‘war on drugs.’
Iti inparuk-at a public order ti International Criminal Court, nakailanad a maiwayat ti status conference inton Hunio 23 manipud 10:00 ti bigat agingga 12:00 ti aldaw, oras ditoy Pilipinas.
Basar iti Trial Chamber III ti International Criminal Court, lima a kangrunaan nga isyu ti talantanen iti nasao a panagdengngeg pakairamanan dagiti sumaganad:
- Deadline ti panagisubmitir ti obserbasion iti Expert Panel Report
- Panangadaptar ti protocol iti panagiggem ti confidential information
- Limitasion iti kaatiddog ti Prosecution Trial Brief
- Panangikeddeng ti sumaruno nga status conferences kalpasan ti judicial recess
- Public statements dagiti counsel
Immunan a naiwayat ti umuna nga status conference idi Mayo 27 no sadinno a nagdesision ti korte a kasapulan pay ti maikadua a session para iti ad-adda pay a detalyado a panangtalantan iti proseso ti kaso.
