LAOAG CITY – Inpakaammo ni Mayor James Bryan Alcid a nakitaripnong a dagus kadagiti opisial, school heads ken administrators ti Department of Education-Schools Division of Laoag.
Daytoy ket gapu iti pannaka-alarma da iti napasamak a pammaltog iti uneg a mismo ti maysa a pagadalan idiay Tacloban City .
Segun iti mayor, napagsasaritaan iti nasao a taripnong ti ad-adda pay a pannakapaiget ti seguridad ken maipasigurado ti kinatalged ti amin a pagadalan ditoy ciudad ti Laoag.
Inbatad na nga adda pay iti pannakaiwayat ti initial reporting dagiti school heads kadagiti security measures nga maipatpatungpal iti agdama kadagiti sakupen da a pagadalan.
Kunana nga adda ti suhestiyon ti tunggal maysa ken napagnunumoan a maidasar amin dagitoy iti sumaruno a panagtataripnong da no sadinno a maimbitaran to pay dagiti kameng ti Philippine National Police ken nagduduma nga ahensiya ti gobierno a tumulong a mangaramid ti security measures a maipatungpal iti amin a pagadalan ditoy siudad.
Innayona a kas maysa a nagannak ket kayatna a masigurado nga adayo ti peligro dagiti ubbing ken tapno maliklikan dagiti aniaman a karit ti panagadal dagiti estudyante a maibilang a tulbek ti pannakagun-od ti arapaap wenno panagballigi da iti masangwanan.
