LAOAG CITY – Dinayyeg ti magnitude ti 6.1 a gingined iti amianan a daya idiay Japan.
Basar iti Japan Meteorological Agency, napasamak ti gingined iti oras ti 5:21 ti bigat iti Pacific off Iwate Prefecture nga adda ti kauneg nga agarup 40 a kilometro.
Narikna ti gingined iti sumagmamano a paset iti Aomori ken Iwate prefectures.
Inbatad ti Tohoku Electric Power Co. nga awan ti naipadamag nga aniaman a napasamak iti Higashidori nuclear power plant iti Aomori wenno ti Onagawa nuclear power complex iti Miyagi Prefecture.
Inpakaammo met ti Japan Nuclear Fuel Ltd. nga awan ti nadadael iti nuclear fuel reprocessing plant iti Rokkasho a maysa a Pacific coastal village iti Aomori Prefecture.
Kabayatanna, awan ti naiparuk-at a tsunami warning gapu iti nasao a gingined.
