LAOAG CITY – Nangipaay ti pammalubos ti Civil Service Commission (CSC) iti Department of Education (DepEd) a mangala ti 10,000 a non-licensed school counselors tapno masolbar ti panagkurkurang ti guidance counselors iti pagilian.
Naamoan a dagiti baro a posisyon ket maawagan nga School Counselor Associate I, a mabalin nga aplikaran dagiti nagturpos ti psychology, behavioral science, wenno guidance and counseling uray awan ti PRC license na basta adda ti 200 nga oras a panagtraining.
Segun ken ni Education Secretary Sonny Angara, daytoy ket paset ti panangipatungpal ti Republic Act 12080 wenno Basic Education Mental Health and Well-Being Promotion Act a gagem na a papigsaen ti mental health support dagiti pagadalan.
Nailatang ti P2 a bilyon iti 2026 national budget para kadagiti nasao a posisyon, ngem naitantan ti implementasyon na gapu iti maiyur-uray a guidelines manipod iti Civil Service Commission ken Department of Budget and Management.
Namnamaen a mangrugi ti umuna a batch dagiti counselor associates ita a tawen tapno dagus a maipaay ti pagkasapulan dagiti estudyante.
