LAOAG CITY – Inbilin ti Sandiganbayan Seventh Division ti pannakai-archive ti kaso a graft kontra iti pugante a dati nga agpanpanday linteg a ni Zaldy Co kalpasan a napaay dagiti otoridad a nangtuntun ti lokasyon na ken mangarestar iti nasurok nga innem a bolan.
Ti panangi-archive ket temporario a mangitantan iti kaso no awanen ti sabali nga addang a maaramid a saan a maibasura iti kaso.
Basar iti judicial records, nangisumitir ni National Bureau of Investigation (NBI) Agent-on-Case Rehom Pimentel ti Return on the Warrant a nangireportan na nga iti baet ti panagtrabaho da ket saan da a nakita ti akusado iti address a nailanad iti Warrant of Arrest.”
Inbatad ti korte nga idaulwan ni Associate Justice Lorifel Pahimna, a ti desisyon ket awan ti panangkanunong iti pannakaisubli wenno pannakabiag manen ti kaso ken ti panangibabawi iti daytoy manipod iti pannakai-archive na apaman a makaala ti korte ti hurisdiksyon iti tao na.
Maipalagip a ni Co ket sumangsango kadagiti kaso a graft ken malversation mainaig iti maipagarop a maanomalya a road dike project iti Naujan, Oriental Mindoro, no sadinno a pimmanaw ditoy Pilipinas idi Hulyo 2025 nga addan ti travel authority para iti medical purposes.
Nangisyu met ti korte ti warrant of arrest kontra ken ni Co idi Nobyembre 21, 2025.
Idi Abril ita a tawen, kinumpirmaran ti Malacañang nga awanen ni Co iti kustodyar ti Czech Republic ken daytoy ket addan idiay France, no sadinno a nagkiddaw ti political asylum.
