LAOAG CITY – Manarimaan ti pannakaadal ti nalawlawa a pagparkingan dagiti behikulo iti aglawlaw ti Laoag City Public Market and Commercial Complex.
Daytoy ket kalpasan ti pannakitaripnong ni Mayor James Bryan Alcid kadagiti Traffic Management Team ditoy siudad ti Laoag tapno mapagsasaritaan daytoy a banag.
Segun ken ni Alcid, naidasar ditoy ti gagemna a makibinnulig kadagiti interesado a partido babaen ti Memorandum of Understanding ken Public-Private Partnership kadagiti pribado nga espasyo nga asideg ti tiendaan a mabalin a pagparkingan.
Inbatadna a daytoy ti umuna nga addang a makitana a mabalin nga ipatungpal tapno masolbar ti problema ti trapiko iti batog ti Rizal Street ken Bonifacio Street aglalo no ti rush hours.
Maipalagip a ti kangrunaan a problema dagiti umili ditoy siudad ti Laoag ket ti kinaawan iti nalawa a pagparkingan kadagiti nagduduma a lugar saan laeng nga iti aglawlaw ti tiendaan.
