LAOAG CITY – Nagkiddaw ti Bureau of Fire Protection iti siudad ti Batac ti structural stability assessment para iti nataltalged a panagsubli dagiti stall owners iti tiendaan.
Segun ken ni Fire Senior Inspector Hendriech Gudoy, City Fire Marshal ti Bureau of Fire Protection iti siudad ti Batac, alas-9:07 ti rabii idi naawatda ti report ti insidente.
Naideklarar a fire out ti alas-6:00 ti bigat ita nga aldaw ti uram iti pampubliko a tiendaan iti nasao a siudad kalpasan ti sumurok siam nga oras nga operasion dagiti bumbero.
Insigida a nagresponde dagiti bumbero ngem naaddaan ti apagapaman a pannakaitantan gapu iti nakapsot a pressure dagiti fire hydrant iti lugar.
Nupay kasta, nakabirokda ti alternatibo a pangalaan ti danum manipud kadagiti kaparanget nga establishimento tapno maituloy ti panangsebseb ti apoy.
Kuna ni Gudoy a mapatta-patta nga uppat nga ektaria ti kalawa ti tiendaan ken rumrummuar nga agarup kagudua daytoy ti nauram.
Adda ti sumagmamano nga stall owner ti nakaisalbar pay ti sumagmamano nga ilaklako ken kagamitanda ngem adda dagiti aglaklako nga awanen ti naaramidanda no diket buyaen nga in-inot nga agbalbalin a dapo ti pagsapulanda.
Inpadanon met ni Gudoy ti panagyamanna kadagiti timmulong iti panangsebseb ti uram kas ti Bureau of Fire Protection iti siudad ti Laoag, Bacarra, Vintar, Sarrat, Pasuquin, Burgos, San Nicolas, Paoay, Badoc, Currimao, Banna, Dingras, Marcos, Pinili, Piddig ken dadduma pay.
Kabayatanna, inpanamnama ni Vice Mayor Albert Chua ti insigida a pannakaipaay ti tulong kadagiti maseknan a naapektaran ti dakkel nga uram iti tiendaan.
