LAOAG CITY – Mangnamnama ni Mr. Marcel Tabije, mangidadaulo ti Provincial Disaster Risk Reduction and Management Office a makapagserbi pay daytoy iti Provincial Government of Ilocos Norte ti sumaruno a lima a tawen kalpasan a naan-anayen a nagbalin a department head.
Inkarina ti agtultuloy a napintas a serbisiona ken ti opisinana nangruna kadagiti posible a sumangbay a kalamidad.
Malaksid iti daytoy, inpasiguradona pay ti agtultuloy a pannakikammayetda kadagiti government agencies, uniformed personel, city and municipal disaster risk reduction management office ken kadagiti barangay tapno naan-anay ti panagsagana ken pannakaprebentar dagiti posible a mapasamak ditoy probinsia.
Maipalagip a naan-anayen a nagbalin a department head ni Tabije babaen iti bileg ti resolusion nga inaprobaran ti Sangguniang Panlalawigan nga umanamong kenkuana.
Naammoan a ni Tabije ket 37 a tawenen nga agserserbi iti gobierno probinsial a nangrugi daytoy idi agtawen pay laeng isuna ti 23.
