LAOAG CITY – Inpasigurado ni Gob. Cecilia Araneta Marcos a mausar a pangsaluad iti biag ken pangtulong kadagiti kakailian nangnangruna iti panawen ti kalamidad dagiti dua a “rescue boat” nga inpaay ti embahada ti pagilian a Japan.
Impeksana ti napalaus a panagyamanna iti Japan kangrunaan kadagiti pannakabagi ti embahada nga immay nangiyawat kadagiti nasao a ramit iti Provincial Government of Ilocos Norte wenno PGIN a da Mr. Naobumi Yokota, Minister for Economic Affairs ti Japan, pakairamanan da Ms. Yurie Mukaigawa, Grant Assistance for Grassroots Projects wenno GGP Head ken Second Secretary, ken GGP Program Officers a da Ms. Kaye Cruz ken ni Mr. Rune Ylade.
Inwaragawag ti gobernador a saan a masupapakan ti adu nga ayat ken tulong nga ipapaay ti pagilian iti Ilocos Norte nangnangruna iti panawen ti kalamidad.
Mangnamnama ni Gob. Marcos a babaen iti suporta nga inpaay ti Japan ket ad-adda pay a mapatibker ti panagpagayam ti Japan ken ti Pilipinas kangrunaanna iti Ilocos Norte pakairamanan ti kalikagum a mapagtalinaed dagiti komunidad a natalged ken kanayon a nakasagana.
Kabayatanna, saan a mailadawan ti kinaragsak ni Bise Gob. Matthew Marcos Manotoc iti panangitungpal ti Japan iti karina a mangipaay iti dua a “rescue boat” iti probinsia.
Impannakkel ti bise gobernador a ti Japan ti kaaddoan pay laeng ti naitulong iti probinsia.
Impalgakna a maibilang ditoy dagiti “foreign grants” ken pautang para iti Ilocos Norte pakairamanan dagiti proyekto infrastraktura sipud pay idi panawen daydi Presidente Ferdinand E. Marcos Sr.
Innayonna a daytoy ti mangipamatmat iti kinapudno ti Japan kas maysa a kaalyado ken pagayam.
