Dinayaw ni ABC President Rbee Ablan iti inisyatibo iti Brgy. 53, Rioeng ditoy siudad ti Laoag a pannakaipaay iti fire extinguisher iti kada purok iti nasao a barangay.
Segun kenkuana, daytoy ti maysa kadagiti mangipakita iti panagbalin nga aktibo ken napateg a panangidaulo iti maysa a barangay.
Babaen iti nasao nga inisyatibo ken panangidaulo ni Barangay Chairman Rischelle Ortal, ket maaddaan ti tunggal purok iti fire extinguisher tapno adda ti mausar a dagus no adda ti mapasamak nga uram iti nadakamat a lugar.
Inbatad na a napateg a mapadur-as ti disaster preparedness tapno maliklikan ti panagramram ti apoy ken masalakniban dagiti biag, sanikua, ken seguridad dagiti residente.
Kabayatanna, agtultuloy ti naiget a koordinasyon ken panagtitinnulong ti lokal a gobierno ken dagiti barangay ditoy ciudad ti Laoag iti panangipatungpal kadagiti programa ken proyekto a mangpabileg iti seguridad ken serbisyo para kadagiti umili.
Saan laeng a panangipaay iti fire extinguisher ti napateg, no di ket ti panangisuro ken panangisagana kadagiti umili iti umiso a panangusar iti daytoy no dumteng ti emerhensia.
Innayon na a makita ti nasayaat ken napintas a panangidaulo babaen iti panangipangruna iti biag ken salun-at dagiti umili.
